Zuu

Zuu Kong He Pehtlai In Hngalh Awk

• 
• 

Details

Published on Wednesday, 06 February 2013 08:07

Written by Khen Cin Thang (Aa Khai)

 Zuu (alcohol aa telmi paoh) din ciocio ah Nu le Pa ahhin Nu hi Pa nakin an rit a fawi deuh. Aruang cu kan pum hi ti lawngte a si i nu hi an pum chung ah ti tlawmdeuh a um i pa sin ah a tamdeuh. Cun zuu hi kan din in enzymes, dehydrogenase (ADH ) ti zong ah an auhmi rawl rialtu a si i kan pawpi ah a lut.

 Cu nih zei rian dah an tuan ti a si ahcun; Zuu kan paw chung a rak luh bak ah ADH nih zuu kha a dang kan pumsa lei ah a kalpi. Nain zuu tawlreltu/a khangtu cu kan thinlung a si (Lever). Atu ADH kan timi hi nu paw chung ah a tlawmdeuh.

Myanmar Rum/Google

 Ti le ADH hi Nu pum chung ah a tlawmdeuh caah Pa nakin Nu hi an Zuu rit a rang deuh. Nu Nih Zu Na Din Ahcun;  

1. Fahrin khawh lonak le nau rawh a chuahter
2. Pungsan tling/ṭha lo (a fa) a chuak i a hme deuh
3. Fale an chuahka ah an zaang i an chia deuh
4. An fale thinlung, cuap, muisam le ruhkhua a tlam a tlinter lo
5. An thang kho lo, hawi bantuk an si kho ti lo
6. An thinglung le an hliah-hlok a tling kho lo
7. Remh than kho ti lo in Zuu nih a khawnden/that lonak a chuahter.

Hrin rih lomi ngakchia a nu paw chung a um lio ah vitamin, energy (thazaang) rawl le ngakchia a ṭhan khawh nakhngaa herhmi thil vialte hi a nu a eimi vialte chung in a pekmi a si. Mah caah cun nu naupawi lio ah rawl ṭhate in le ngakchia a than khawh nakhnga a herhmi eipiak hi a biapi tuk hringhram. Fa nan pawi lio ahhin cun a si khawh ahcun, tisik an-hnah deuh hi eipiak ah a tha. Ziah ti ahcun mah an-hnah ah khan vitamin a dangdang kan pum nih a herhmi aa tel dih. Kanmah Chinmi cu buh le Sa lawngte a eimi kan si caah facang le Sa ah protein (thannak) lawng a tam i a dang ṭhawnnak/pum nih a herhmi vitamin aa tel ti lo.

 Zuu lawng si lo in a dang Sii (medicine), paracet, sii-lei paohpaoh cu thla khat si lio a silole zarh 3 si lio hrawng ah ei le din hi sum khawh i zuam ah a thabik. Ziah ti ahcun mah caan ahhin paw chung i a ummi hrin rih lomi fa cu, pumtling in ser a ran, aa thawk lio caan a si. Zarh 3 le thla khat hrawng ah hin, naute cu  thin, lung, kut, lu, kee aa ser lio a si caah mah lio caan ah cun medisin (Sii) nan ei, nan dinpiak ahcun  mah nih khan a hrawh khawh, a tlamtling lo ah a canter khawh.

Mah hmanthlak pawl hi fa an pawi lio ah a nu zuu a din ruangah a fale hi tamtling lo in a chuak mi an si. Ahmasa ah khan, ngakchia a thannak ding caah a herhmi vialte cu a nu a ei mi vialte chung ah a pekmi a si caah  a nu zuu a dinmi kha a fa a dinter ve i, a hrin rih lo mi fa cu tlamtlingte in a nu paw chung ah a thang kho ti lo. A dongnak ah cun hi hmanthlak pawl bantuk in an chuak, hrin an si.(hmanthlak kan van langhter kho lo i kan ngaithiam u__TCP)

 Note: Khen Cin Thang (Akhai) hi Oslo i Atlantis Medisinske College (http://www.amh.no) ah kum thumnak B.Sc a kai liomi a si. Laica (Hakha) thate in a tial khawh lo caah Si Bawi Mang Lian (University of Tromsø) nih Laica a remhpiakmi a si.

Ref: The Chinland Post Vol.1 No.4